Sälber aber isch si sech nicht bewusst, wi si würkt. Grad weis si nid rächt, i weli Richtig ihres Läbe geit. Färn het si d Matur gmacht, u plötzlech bruuchts eigeti Entscheide. Grad no verdüderlet si sech d Zyt, schaffet vo Zyt zu Zyt im Service vomene Sportzentrum. Aber es cha nid lang so wyter gah. Söll si jitz a d Uni gah, oder villech doch lieber en Usbildig plane i Richtig Verwaltig. Söll si sech ender elegant alege oder doch lieber alternativ locker, villech sogar mit dürlöcherete Hose? O ir Liebi isch alles offe. Zwe Manne schwärme für si, u si weis nid, wele ihre besser gfallt. Öppedie geit si mit em einte uus, u mängisch mit em andere. Bi beidne füelt si sech guet, aber eigentlech isch da nid meh. O ne Lischte, wo si alli Vor- u Nachteile vo de beidne ufschrybt, git ere nid würklech Klarheit. Trotz all däm isch si glücklech, fröit sech am Läbe, spilt Bädminton, geit i Tanzkurs u gniesst ihri Freiheit. Si het ke Ahnig, was speter im Läbe no alls cha schief louffe u dass de sicher o viil Stolpersteine im Wäg stöh. Zum Glück weis me nid im Voruus, was alls uf eim wartet!
Im Momänt sy ihri Wäge alli offe. Si fröit sech uf alls Nöje i ihrem Läbe, isch voll Hoffnig u sicher, dass ds Schicksal ihri Wäge tuet mitbestimme. Ihri Unbeschwärtheit u Fröhlechkeit sy asteckend. U plötzlech chunt der Philipp i ihres Läbe, zäme mit ihm chönnt si sech e Zuekunft vorstelle, ohni vorhär Lischtene mit Vor- u Nachteile z schrybe. Süferli nechere sich di beide aa, u nadisna geits gäge Wienachte. Di erschti Wienacht zäme, zum erschte Mal di jewyls anderi Familie lehre kenne. Zum erschte Mal … öb das villech ihre Ehemaa wird? So langsam weis si o, i weli Richtig si wott gah, um je lenger je meh sich sälber z wärde. Daderfür het me ja es Läbe lang Zyt.
Fröhlechi Wienachte öich allne!
Ursula Pinheiro-Weber
Berndeutschspezialistin und Autorin verschiedener Lehrbücher
Was genau?
gmögig – sympathisch, anziehend
fyn – fein, zart
Gspüri n. – Feingefühl, Empfinden
Matte f.– Wiese
öppedie – ab und zu, von Zeit zu Zeit
schaffe – arbeiten
verdüderle – sich sinnlos die Zeit vertreiben
zwätschgele– Zwetschgen vom Baum lesen
färn – letztes Jahr
süferli – sachte, vorsichtig, behutsam
aneechere – annähern
