D Petra Müller, ihres stolze Grosi, het im Chäller z tüe, es git no Wösch abznäh. Im Stägehuus trifft si ihri Nachbarin Antonia vom dritte Stock, u grad versuumet si sech es Zytli. Es geit ume zerstört Pingpong-Tisch vorusse, wo e Liferwage zämegfahre het. Schynts geits no es Chehrli, bis e nöje chunt.
Zrügg ir Wohnig gseht si d Nora vertieft i ihri Malereie. Aber si weis: D Nora tuet mängisch nid lang elei verwyle, normalerwys bruucht si viil Ufmerksamkeit vo Grosi u Grosspapi. Drum het d Petra geschter ir Chuchi scho alls parat gmacht. Rüebli, Fänchel, Zucchetti u Härdöpfle für d Suppe u Öpfle für e Chueche zum Dessert het si scho gwäsche u i verschidene Schäli agrichtet. Aber plötzlech mues si d Luft ahalte: D Schäli sy da, aber d Gmües u d Öpfle? Wo sy ömu o die? Wo si d Schublade uftuet, ligt da e Fänchel, grad wonär nid häreghört. U zwe Öpfle entdeckt si uf em Tablar über der Abwäschmaschine. Wyteri Gmües chöme füre: Zucchetti under em Ässtisch, es paar Rüebli uf em Balkon verteilt, e Härdöpfel näbe der Bluemevase under em Fänschter u no zwe hinder em Kanapee…
Was isch da o los? «Nora! Was isch de hie passiert?», rüeft ds Grosi, nid toube, aber erstuunt. D Nora luegt vo ihrem Bild uuf, strahlet u poleetet: «Grosi, i ha ds Fueter für d Bäre versteckt.» D Grosi runzelet d Stirne: «Weli Bäre?» «Eh die us em Bärepark. Jede Tag dörffe die doch i alt Bäregrabe, wo si früecher sy gsy, u dert ds Fueter sueche, wo d Pflegerinne u Pfleger für si versteckt hei. Ds Grosi schmunzlet. Si erinneret sech plötzlech: Ja, di Mutze wärde tatsächlech jede Tag für ei bis zwo Stund umquartiert. I dere Zyt chöi di Parkagstellte der gross Bärepark putze u ufruume. U o dert müesse d Bäre ds Fueter sueche, fasch wi i der freie Wildbahn. D Nora het guet ufpasst bim letschte Bsuech u schynts beschlosse, ds Spiili eifach i d Wohnig z verlege. «U wo bissoguet isch der Räschte vom Gmües?» D Nora springt vom Stuel: «I zeige ders.» So hei ds Grosi u d Nora no mit viil Glächter d Wohnig abgsuecht, u hei fasch ds ganze Bäremenü gfunde. Sogar der Öpfel im Gummistifel vom Grosspapi…
«Weisch was?» seit ds Grosi drufabe, «bevor mir jitz d Suppe u der Chueche mache … möchtisch nid es chlyses Chörbli
packe u das de Bäre bringe?» D Nora rysst d Ouge uuf. «Dörffe mer das?» «Hüt mache mer en Usnahm. Mir frage vor Ort, öb si di Sache chöi bruuche. U villech darfsch sogar bim Verteile mithälffe. Nächär chouffe mer halt usnahmswys eifach e Pizza zum Mitnäh…»
Was genau?
aamächelig – einladend, freundlich
ohni Mux – ohne Mucks, lautlos
Grosi n. – Oma
Wösch f. – die Wäsche
z tüe ha – zu tun haben
Stägehuus n. – das Treppenhaus
versuume – Zeit vergeuden
vorusse – draussen
Pingpong-Tisch m. – Tischtennistisch
es Zytli n. – eine Zeit lang
Chehrli n. – die Zeitspanne, eine gewisse Zeit
parat mache – vorbereiten
d Luft ahalte – den Atem anhalten
uftue – öffnen, aufmachen
häreghöre – hingehören
Abwäschmaschine f. – Geschirrspüler
Kanapee n. – Sofa
toube – zornig, böse
poleete – lauthals verkünden
Mutz m. – Bär
schynts – scheinbar
bissoguet – bitte
Grosspapi m. – Opa
Info:
www.dialektbuch.ch
